Bajram Ramadan, founderi taro Romani IT, sas gosti ki romani programa „Bijandipe“ ki Makedonikani Radio Televizija – MRT 4.
O gostuibe sasa šajdipe te sikavel pe o Romani IT, o digitalno drom savo o projekti mangela te kerel, thaj soske i tehnologija, o sikljovibe thaj i Romani čhib trubul maj but te aven jekhethane ko interneti.
„Bijandipe“ si programa ki Romani čhib ko MRT, savo anela informacije thaj teme vaš i romani khedin, thaj isi les važno than ko informiribe, sikljovibe thaj arakhibe e Romane čhibako thaj kulturako.
Romani IT – tehnologija ki Romani čhib
Romani IT si digitalno portal savo fokusirinela pe tehnologija, sikljovibe thaj romani khedin.
I idea si e manušenge, posebno e ternenge, te del pe maj lokho drom dži ko informacije bašo:
- AI;
- interneti;
- web thaj programiribe;
- digitalno arakhibe;
- aplikacije;
- digitalne alatija;
- thaj Roma save keren buti ande IT thaj digitalno sumnal.
Ko interneti isi but džanibe ki anglikani thaj aver čhibja, ama ki Romani čhib panda isi cikno kvalitetno sodržina baši tehnologija.
Romani IT mangela odova te kerel le prekal praktično tekstencar, intervjuncar, videoncar thaj digitalne kerimatar.
AI trubul te pomožinel amen, na te gindinel vaš amende
Jekh andar e važne porake savi Bajram Ramadan vakerdas vaš AI si:
„O AI na trebela te razmislinel amenge, numa trebela te pomožinel amen ko pošukar em pobrzo te završina amari buti.“
I poraka si lokhi: AI šaj te ovel zorali alatka bašo sikljovibe thaj buti, ama o manuš trubul korkoro te razmislinel, te proverinel thaj te džanel sar te koristinel la.
Odoleske ko Romani IT o AI na prezentirinela pe sar zamena vaš o manuš, ama sar alatka savi šaj te pomožinel amen maj sig te sikljovas, te rodel informacija thaj te keras digitalne kerimata.
Soske i Romani čhib trubul te isi ko digitalno sumnal?
Te mangaja i Romani čhib te ačhovel džuvdi vi bašo e neve generacije, trebela te ovel thaj ko digitalno thana.
Na samo ko vakeribe ja ko lilja, ama vi:
- ko web sajtija;
- ko mobilne aplikacije;
- ko videa;
- ko podcastija;
- ko AI;
- thaj ko neve digitalne alatija.
Kana o terno Rom šaj te čitinel, te sikljol thaj korkoro te kerel nešto ki piri čhib, odova dela la e čhibake nevo than vi ko avutnipe.
Baš odoleske jekh andar e resarina taro Romani IT si e terne Roma na samo te oven korisnikija e tehnologijake, ama vi kreatorija.
Taro website dži ko maj baro digitalno than
Romani IT panda bajrola thaj o plano si ko avutnipe te isi maj but:
- praktične IT tekstija;
- video legariba;
- intervjua;
- teme vaš AI;
- digitalno arakhibe;
- programiribe;
- romane aplikacije;
- thaj prezentiribe projektengo save Roma keren.
O mangibe si Romani IT te na ačhel samo jekh website, ama poloke-poloke te ovel jekh digitalno platforma kote džanibe, tehnologija, manuša thaj neve šanse aven jekhethane.
Dikh o gostuvibe taro Bajram Ramadan ko Bijandipe:
O celo video taro gostuvibe šaj te dikhen ko YouTube:
YouTube:
Te interesirinela tumen tehnologija, AI, programiribe ja digitalno arakhibe, dikhinen vi aver sadržajo ko:
Romani IT:
https://romaniit.com/
Amari kultura. Amaro digitalno than.
