Ko 7-to oktomvri o militantija taro Hamas paraglajderencar, motorencar, vordonencar, kamionencar thaj buldožerencar kerge atako upral ko Izrael taro pojas Gaza. Pobuter taro 1200 Izraelcija sine mudarde, a 240 sine kidnapirime. Taro odova dive pa sa đi akana ko akala atakija isi 33,000 žrtve.
Ko izbor tari cel o Izrael ko napadija thaj lengoro lociribe koristinga Veštačko Intelegencija, otkrinela i istraga taro 972 Magazine thaj Local Call.
Lavander tano softveri kova analizitinela o informacije kola tane khedime prekal ko sistem bašo masovno nabluduvanje bašo vaker tuke 2,3 milionija manuša taro pojas Gaza. Pal odova kerela procenka baši verojatnost deka nesavo konkretno manuš tano aktivno členi taro voeno krilo Hamas. Spored o informacija, i mašina dela bašo sekova manuš procenka taro 1 đi ko 100, koja vakerela kobor tano verojatno te oven ola militantija.
Lavander tano trenirimo te kere identifikacija taro karakteristike taro penđarde aktivistija taro Hamas, kolengere podatke sine čhivde ki mašina sar podatokija bašo treniriba, em pal odova te locirinen akala karekteristike upral ki opšto populacija vakerena o izvorija. Odole manušeske kola so ka utvrdinel kaj isile različna karakteristike ka doresel bari ocenka thaj avtomatski ka ovel potencijalno cel bašo atentati.
