“Ko miro 8to bijando dive sineman šhajdipe te dobinav poklon kompjuteri tari jek paše miri familija tari Amerika.”
1. Zdravo šaj li te vakere amenge pobuter bašo tuke, so isitut zavšimo em soske baš odova biringan te siklove?
📌 Zdravo, isiman 33 bers, bijando sijum thaj barilum ko Kičevo. Idori završingum osnovno thaj sredno škola. Sineman prekrasno čhavoripe sar sekova jek so sine bijamo ko odola berša. Panda sar čhavoro interesinenaman sine javera bukja thaj so i te dikav sine pučava sine sar kerela buti jail pak so isi andre.
📌 Najviše interesinenaman sine I elektronika pred o kompjuterija. Ko miro 8to bijando dive sineman šhajdipe te dobinav poklon kompjuteri tari jek paše miri familija tari Amerika.
📌 Odova sine Pentium 1, thaj kerela sine buti ko Windows 95 em odoboka sine mange interesno so dušaja ađikerava sine te avel vikend te bešav po nekobor saatija te kelav ki leste. Đanava sine em te pravav le te dikav so isile andre, thaj sijum sine vooduševimo sar kerela sine buti. Nekobor puti na đanava sine te mukav le sebepi so kosava sine jail premestinava sine pak nesave fajlija javerte mislindor kaj tane igre. Miro dat sinele penđarutno kova so ko odova vakti sine programeri thaj mange dikola kaj sine devel e kompjuterenge, soske koga ka avel sine te kerel le, kerela le sine samo bašo nekobor minutja. Me but voshitinavaman sine odole manušeske so po dajek puti namerno brišinava sien nešto, te šaj te dikav so kerela thaj sar kerela palem te ovel funkcionalno o kompjuteri. Taro samoto miro dikiba me ko mire 11 berš više đanava sine te kerav preintalacija o kompjuteri, te arakv drajverija taro internet em nešto slično.
📌 Kana završingum osnovno škola, na sine mange pharo te birinav te siklovav Informatika sredno.
📌 Kana alo o vakti te birinav fakulteti biringum Informatika thaj iklilum avrijal tari phuv te siklovav.
2. Kova tano to rabotno iskustvo panlo ko IT, thaj kova tano to najbaro uspeh đi akana?
📌 Našti te vakerav jali pak te odlučinav te penav kova tano miro najbaro uspeh ko akava so kerava le buti. Sekova kerdo nešto naredno računinava le sar pobaro uspeh taro prethodno. Odoleske mislinava kaj taro dive ko dive ko IT sumnal mislinava kaj sijum sa pošukar taj pošukar.
Kana vekje vakergum deka taro tiknipa sineman kompjuteri thaj sineman šajdipe te siklovav but bukja thaj kana kerava sine javerencar lafi olenge dikola sine kaj kerava lafi ki javer čhib.
Đi đava sine ko sredno sineman šajdipe te arakav jeke amale kova sine dosta ponapredno mandar, thaj kerela sine bukja ko odova vaki so me ni našti sine te zamislinav len.
📌 Počmingum te čitinav lila kola so delalen sine man me dadeskoro amal, em agahar ko nekobor naredna berša počmingum thaj te programirinav, te kerav programe kola šhaj sine te keren šteta bašo javera kompjuterija, te čorav lozinle kola so sine mrežno phanle o kompjuterija.
📌 Odolea ko naredno periodi me sijum sine akana penđardo sar Black Hat Haker ( Kale Šešireskoro Hakeri ), numa na sine mange jasno deka odolea me kerava sine krivično delo. Ko odova vreme I zaštita taro sistemija na sine but ko baro nivo sar soj avdive, thaj odova sine mange pobari motivacija mange te ovav sa pošukar em pošukar. Ama mange odova so sine mange ljubopitnost ko prvo berš taro me studije sineman but penđaribe bašo Linux Sistemija, em mo rabotno iskustvo đala sine prekal ki odoja nasoka tari penetracija, bezbednost thaj ikeriba o kompjuterska mreže. Znači ko kratko vakerdo, počmingum te siklovav dosta bukja em taro odola vakerde lošna manuša sijum avdije so sijum jali pak sar so penena Etičko Hakeri.
📌 Moro rabotno iskustvo ko IT tano pretežno bezbednost ko sistemija tari jek bari ogromno kompanija kolate momentalno kerava buti. Isto agahare isiman but šukar đandipe ko Microsoft Tehnologije thaj povekje vakti programirinava ko .NET t.e e programsko čhibjaja C#.
3. Tari tiri perspektiva kobor amen o Roma sijam zapoznajme e tehnologiencar, dali amari zaednica pravilno koristinela o tehnologie?
📌 Absolitno pobaro delo taro Roma nane šukar zapoznajme. Amari zaednica o neve tehnologije poviše koristinelalen baši zabava thaj mislinava kaj tano odova šukar, numa o ista odola šhaj em te koristinenpe bašo po produktivna celija. Mislinava kaj tano odova o rezultati so o Roma ki Makedonija nanelen dovolno penđariba bašo tehnologija, thaj nađanena skoro ništo baši bezbednost ko online sumnal, a panda pohari baši privatnost em kobor odova tano bitno koga koristinea o internet, thaj tane žrtve ko online atakija.
4.So mislinea bašo portali Romani IT, thaj dali falinela nešto so šaj kerelape thaj podobrinelape baši Romani zaednica?
📌 Šhaj me sekogaš te ovel pošukar, inače but šuži ideja. Soske potenciringum o probelmi baši amari zaednica deka na obrninela nisavo vnimanie baši piri privatnost, thaj kola lična informacije mukena thaj čhivena ko internet, kola dosta šhaj te zagrozinen piri lično bezbednost. Ko odova pole ka ovel šukar te kerelpe nesavo serijali taro videa sar trebela te ovelamen pobari zaštita koga sijam online, soske tano mitno, kola dane o možna posledice ako amare informacije tane online dostapna sarinenge. Ka phenav jek primer baši zloupotreba: Slikiba koga lena nevi vozačko/viza/lično karta thaj objaviba ko socijalna medijumija tani but bari greška. Jek mrimer kova so momentalno mange ki godi tano deka odola informacije tane dovolna bašo lejbe brzo krediti!
